كرونيك الجميله و المتدين

الحلقة 1:

-شوف شوف ملكة متعدية 

-هههه هيا نبزنسوها قالك تركح فيسع 

-ههههه خطانا منها حكايتها فارغة خرجت مع شطر ولاد الحومة 

-ههههه تي أمشي بركا خلينا نبدلو جو 

-باهي صحوبا 

كانت تمشي و تتمايل لابسة شورط دجين قصير و مريول خلعة شعرها مسيب قصير شوي و ريحت برفانها قالبة الدنيا 

ملكة بنت الحومة إلي مهبلا الناس لكل ملي جات و هي صغيرة خذات الأنضار لكل بالرغم إلي عمرها صغير بنت 18 سنة مازالت كي خذات الباك لاكن هي كانت كبيرة في مخها و واعيا يعني ثقافتها كبيرة مشكلتها الوحيدة هي أنو ماشي فيبالها ناس لكل قلبها أبيض كيفها و هذا إلي خلاها تحكي مع الولاد برشا هذا ميمنعش أنو هي متكبرة و شايفة روحها حاجة كبيرة مهم منغير منطول عليكم شخصيتها متناقضة برشا 

-عسلامة ملكة سافا 

-أهلا لولاد 

-وينك هالغيبة عندك جمعة مطليتش 

-كنت عند عمتي و تو سامحوني لازمني نمشي بالسلامة 

-بالسلامة يا قطوسة سلم علي الدار 

تبسمت و مشات خلاتهم يقطعو فيها و يريشو 

كان قاعد بعيد عليهم مرة يغزرلها و مرة يهبط عينيه ميحبش يشوفلها قبل متولي حلالو عندو أمل كبير أنها تولي مرتو و يحقق حلم حياتو و يعرس بالطفلة إلي حل عينيه عليها 

عمر عمرو 26 سنة شيخ في الجامع و عندو ديار و حوانت للكراء معروف بصدقو و قلبو لكبير يحترموه كبار و صغار عاش حياتو يتيم عمرو موصل طفلة بكلمة ولا هز فيها عينو الطفلة الوحيدة لحبها هي ملكة الطفلة المدللة المغرورة لعمرها خزرلتو حتي بشطر عين ممكن متعرفش إذا كان موجود ولا موش موجود 

هذا كان حب عمر لملكة الحب الطاهر النظيف حبها بكل شي فيها و هي متعرفش حبو ليها ، 

الحلقة 2: 

كي العادة عمر ساهر يخمم في ملكة موش منجم ينسي حبها قلبو واجعو من جيهة يحب يرضي ربي و يبعدها خاترها موش متاعو و من جيهة يحب يعرس بيها و يسترها راسو باش يتكسر حتي كي يصلي صلاة الإستخارة ميجيه شي تعب و حار أمرو 

نص الليل يشوف فيها هابطة من كرهبة و طفل يبوسلها في يدها بقا يستغفر لين يشوف في أولاد الحومة دارو بيها و يرمو عليها في الكلام في محلاك في مبنك و هي ساكة مرعوبة لين بداو يقربو و يشدولها في إيدها و هي وجها صفار بدات تخاف 

يشوف فيها و عينيه حمارو بالغش هبطلهم طول 

-أستغفر الله شنوا هذا 

-شيخ عمر أهرب أهرب 

هربو لولاد لكل خلاوها تهبط في روبتها القصيرة حاشمة 

-سامحني شيخ عمر تعبتك معايا و مرسي خاترك جيت في الوقت المناسب 

تبسم و هبط راسو 

-أمشي معايا خليني نوصلك لداركم 

كانت تبع فيه و ساكة بطبيعتها متهضموش برشا تحسو ياسر معقد و ميعرفش يعيش حياتو 

أما هو كان طاير بالفرحة تمناها كان جات علي ذمتو و لابسة لبسة محتشمة وقتها يكون مرتاح و يتصرف معاها علي راحتو و يستعرفلها بحبو لمخبيه سنين في قلبو 

-عيشك شيخ عمر تنجم تروح سايا وصلت 

-خليني نزيد نقربك أكثر لداركم 

-عيشك بارك الله فيك 

-لا لازمك نتهني عليك و نوصلك لباب الدار 

-شيهمك فيا بربي ماو سايا وصلتني لهوني يزي كثر خير تفضل تنجم تروح

هبط راسو و حس قلبو وجعو دموعو كانو محبوسين بالسيف عاود هز راسو تبسملها تبسيمة مخبيا وراها حزن و وجيعة كبيرة و مشا خلاها تمتم وحدها 

"بففف تي منين طلعلي هذا قداه يكبش الصبر يا ربي"

كان ساجد يطلب في ربي باش يرحمو و يعاونو في هالحب لإبتلاه بيه ربي دموعو سبالة علي وجهو حاسس روحو ضعيف برشا كي يشوفها ولا يسمع إسمها يحس برعشة قوية في قلبو مينجمش يتحكم في روحو 

كمل صلاتو و رقد طول و هذي أول ليلة يحلم فيها كان يشوف في روحو لابس الأبيض و هي بحجابها واقفة جنبو و تغزرلو و تقلو إلي حلمت بيه طول عمرك باش يتحقق

قام مقجوع من النوم موش مصدق حلمو يعني ربي تقبل دعواتو و باش تكون مكتوبو 

.

.

تبمو لبنات شبيكم راقدين و الجامات ناقصة وينو تفاعل العادة 😘

الحلقة 3:

كانت خارجة الصباح تشري في الخبز لين تشوف فيه جايها بدات تزرب في خطوتها متحبش تشوفو 

-ملكة ملكة 

-صباح الخير شيخ عمر 

-صباح النور   نحب نحكي معاك في موضوع 

-تفضل إنشاء الله خير 

حس روحو حاشم علي الأخر كيفاه باش يقلها علي في بالو عطاها بظهرو و حكا معاها 

-يا بنت الناس عندي برشا نحب عليك و اليوم تشجعت و حكيت معاك و نحب نجي نخطبك و نعرسو علي سنة الله و رسوله 

يسمع فيها تضحك باش تموت بالضحك أما كمل كلامو 

-ملكة ممكن تشوف فيا شيخ و قوي أما راو كي نكون قدامك نضعف و أنا ميساعدنيش نبقي نشوف في الطفلة لنحبها و هي موش حلالي هذاكا علاه نتمني كان توافق علي الخطبة خاترني ..خاترني نحبك 

الكلمة خرجت منو بالروح هو دار باش يشوفها يلقي روحو وحدو إيه نعم مشات و خلاتو يحكي وحدو موقحها بصراحة 

"يا شيخ عمر شنوا عملت فيك هالطفلة لوقتاه باش نبقي نجري وراها لوقتاه باش نبقي نحوز في الحرام و أنا نغزرلها أه يا شيخ وليت مسخرة و تضحك عليك النساوين أما مدام ربي بشرني متأكد باش تتفتح في وجهي يارب عاوني راني عبدك الضعيف معنديش غيرك"

كي العادة خرجت ملكة في الليل بالسرقة باش تسهر لين جا ولد الحرام و قال لبوها علي خروجها و سهرياتها 

بقا بوها يستني فيها في مدخل الحومة يعني بجنب دار الشيخ عمر 

-ههه بيبي وقتاه نعاودو نسهرو مرة أخري 

-في  أقرب وقت حبيبي 

-نحبك ملكة أمممممواه محلاك 

-ليلتك زينة حبيبي 

هبطت من الكرهبة و هي فرحانة خاترها تخرج مع الطفل لتحبو دخلت للحومة و تلقي بوها يستني فيها معدتها وجعتها من الخوف 

-ب بابا 

-إيه بوك يا بنت الكلب 

-بابا شبيك 

-كل ليلة خارجة تهمل و تقلي شبيك 

بدا صوتهم يعلا لين سمعهم الشيخ عمر و هبطلهم 

-سي عمار لباس شفما 

ردت عليه ملكة :شدخلك أنت وين تلقي حاجة تدخل فيها ألهي في روحك و خلي الناس تعيش حياتها 

كلامها وجعو برشا لين يشوف في كف جاها من عند بوها لا يقري لا يكتب 

-أمان بابا تضربني جرد واحد يدخل في روحو 

-هذاكا سيدك يلي متحشمش راجل عقل و دين و أنت الهملة و التفوريخ  وليت منعوت بالصبع إلي يشوفني يضحك شقالك شقال عليك بنتو كل ليلة تسهر و تهمل مع إلي يسوي ولي ميسواش 

تكلم الشيخ عمر:سي عمار نجم نحكي معاك في موضوع خاص 

.......الحلقة 4:

-تفضل شيخ عمر 

-سي عمار أنا مستعد نعرس بملكة علي سنة الله و رسوله و نسترها 

-والله يا شيخ عمر منلقاش خير منك علي الضالين أمين تجي تخطبها و إلي فيه الخير ربي يتمم فيه 

-حاضر سي عمار غدوي في الليل إنشاء الله نجي نخطب 

-مرحبا بيك في كل وقت 

مشا شيخ عمر لدارو و هو الفرحة ماليا عينيه صحيح يعرفها موش موافقة عليه أما هو فرحان بيها و تو مع الوقت تولي تحبو 

-بابا ياخي سافا في مخك توافق عليه 

-العرس باش يتم منغير حتي كلمة الحمد لله ربي جابلك عريس باش يسترك و نرتاح من همك 

-بابا راني بنتك علاه تعمل فيا هكا راو عندي شكون يحبني و باش يجي يخطبني 

-وينو كلمو كان جاك و خطبك تو نحكي مع الشيخ و يبطل 

-تو تو نطلبو 

بقات تطلب فيه و تعاود لين هز عليها تسمع كان في صوت غناء و بنات تتمجلغ معاه عرفتو في بواتا بالرغم إلي هو عمرو مقلها نمشي للبواتا نسهر ديما عامل روحو هاكا الطفل العاقل 

-سامح بابا باش يعرسلي و كان أنت تخطبني يرفضو عيشك إيجا غدوي أخطبني باش نكملو مع بعضنا 

-ههههه ملكة المهبولة هههه أنا باش نوافق ناخوك هههه تحلم 

-سامح شبيك تحكي هكا 

-تي بري....  هذاكا شمازال كان ناخوك 

-سامح.. 

علق عليها خلاها تبكي بحرقة عمرها متوقعت روحها تتحط في موقف كيما هكا هذا هو سامح لحباتو و حلمت تكمل معاه حياتها يخسر عليها كلمتين يسخسخها بيهم و يعلق عليها

-بابا غدوي الخطبة أنا موافقة 

-شنوا صحيبك مشا و خلاك كان جاء يصلح بيك راو ميخرجش فيك بالسرقة من الدار و يروح بيك عقابات الليالي 

غزرتلو غزرة كلها ندم و لوم حست روحها جهامة منغير روح عدات ليلة كاملة و هي تبكي و تتحسر و كل مرة تبقي تسب و تلعن في الشيخ عمر كان مجاش هو في الحكاية راهو مصارش فيها هكا هذاكا علته قررت تمرجو و تعذبو

الحلقة 5:

خرجت ملكة من عند الحجامة و صحباتها دايرين بيها تصنع في التبسيمة بالسيف بالنسبة ليها ليوم جنازتها موش خطبتها و زيد عمر طلب من بوها باش تلبس حجاب و حاجة مستورة و هذا إلي زاد شعل فيها النار. 

وصلت للدار دخلت لبيتها لين تسمع في حس كرهبة الشيخ عمر بطبيعتها كرهبة علي قدها 

دخل و في يدو ورد و قاطو و هو مكستم و بان بدنو المسكل الرجولية طاغيا عليه أول ماشافوه لبنات مشاو طول لملكة يحكولها عليه في هاو محلاه في هاو محلا بدنو و هي تسمع من وذن تخرج من الأخري ناقمة عليه برشا و ناقمة علي الوضع إلي هي فيه 

-بنتي ملكة جيب القهاوي و إيجا خلي العريس يشوفك 

-حاضر أمي 

خرجت أمها و بقات تحكي وحدها "بففف تي هاني من تو وليد خدامة عندو باهي يا شيخ عمر تو نوريك ملكة شتعمل " 

خرجت و التبسيمة علي وجها هازة القهوة و تميل في راسها تضحك أول مشافها شيخ عمر هبط راسو و بوها حشم علي الأخر خلاتهم الكل مصدومين خرجتلهم بشورط قصير و خلعة  و شعرها مفتوح  و هي تضحك و تتبسم 

سرباتلهم القهاوي و قعدت حاطة ساق علي ساق و عايلتها كلاوها بعينيهم قريب يقتلوها 

ترشف شيخ عمر القهوة و هو قريب يلهب بقا يغزرلها  بعينين ثابة و البسمة علي وجهو 

كان تشوفلو  مصدومة فيه عمرها متوقعاتو يشربها بعد معباتها بالملح و الفلفل أما هو كان يتبسم عبارة مصار شي 

تمت الخطبة و خرج شيخ عمر باش يروح أول مخرج من الباب بدا يمروح علي فمو و ينفخ من السخانة و الحرورية إلي في لسانو 

كانت واقفة في الشباك تغزرلو كيفاه مربوث و تضحك علي حالتو لين تحس بيد جبدتها من شعرها 

-يا بنت الكلب هكا تحشمني مع الشيخ و تلبس دبش هذا 

-سيبني بابا

-مانيش مسيبك يلي متحشمش لازم نعاود نربيك من أول و جديد 

-بابا عيشك سيبني وجعتني 

-العرس باش يكون بعد جمعة فهمت ولا و رد بالك تخمم تخرج من الدار قبل متوصل راجلك والله كان تعملها و تخرج نقتلك 

-نوعدك منخرجش نوعدك 

سيبها و طربق الباب و خرج خلاها تغفص في دموعها و زادت نقمت علي شيخ عمر خاتر عمرها مكلات طريحة من بوها كان وقت إلي دخل لحياتهم

تعداو نهارين علي الحكاية و ملكة مخرجتش من بيتها حتي كي جاها شيخ عمر باش يحكي معاها محبتش تقابلو و تحضيرات العرس الكل قايمة بيها أمها

تلفونها يصوني مسكتش في الأول مشافتلوش بعدين كي كثر عليها التكليم غزرتلو تلقاه سامح هزت طول منغير متخمم

-ألو سامح

-وينك ملكة شبيك معاش تخرج و من قبيلة نطلب فيك متهزش

بدات تبكي و تنوح

-بابا باش يعرسلي بشيخ و العرس الجمعة هذي

-شنوا باش يعرسلك بشايب

-ياريت كان جا شايب علي الأقل ميبطاش برشا و يموت نرتاح منو هذا شيخ أما صغير عمرو 26 سنة

-أسمعني ملكة شنوا رايك تهرب معايا و نكملو حياتنا مع بعضنا

-ياريت والله

-صباح بكري تحضر روحك قبل ميفيقو أهلك نلقاك قدام الحومة نهزك و نمشو

-باهي هاني نستني فيك

علقت التلفون و الفرحة ماليا عينيها و أخيرا باش تهرب و ترتاح من هالعرس المجبورة عليه

عدات ليلا كاملة و هي تحاول تحل الشباك منغير حس خاتر بوها مسكرو عليها

بدا الصباح يطلع و هي تستني بالدقيقة و الدرج وقتاه باش تهرب نسات كلامو إلي جرحها و بكاها نسات كل شي منو همها الوحيد تهرب و ترتاح

كلمها سامح و عطاها الإشارة باش تخرج و هي مكانتش من الرافضين نقزت طول من الشباك و مشات تجري و تتلفت وراها خايفة كان يشلقو بيها هي هكاكا لين تطبع في راجل هي دارت باش تعاركو لين شهقت و حلت عينيها

- ع عمر شيخ عمر

-ملكة

-ش شتعمل هوني في الوقت هذا

-جيت باش نصلي في الجامع تو وقت صلاة أنت شتعمل هوني و شبيك في الحالة هذي

هو يحكي لين يسمع في كرهبة تزمر و هي تغزر و خايفة مربوثة عرفها ناوية تهرب

-ملكة الطريق لماشيا فيه معندو وين يوصلك و الطفل إلي تبع فيه كان جاء ناويك في الحلال عمرو ميخمم يهرب بيك كان جاء يخاف عليك راو حكا مع بوك باش ينجم يقابلك و يخطبك

-.....

-تكلم ملكة كان كلامي غالط قلي والله كان يجي يخطبك و يعرس بيك نوعدك نخليك علي راحتك المهم تكون أنت فرحانة

-شيخ عمر عيشك مدخلش روحك في حاجة متخصكش و ماك بتمشي تقول لبابا برا قلو محسوب

-لا مانيش باش نقلو ماكش صغيرة باش نحاسبك أنت تعرف مصلحتك وحدك و تو بالسلامة باش نصلي و أنت أعمل لتحب عليه

مشا و خلاها مصدومة عمرها متوقعاتو يكون حنين و قلبو كبير كيما هكا كان ماشي فيبالها باش يفرض سلطو عليها و باش يخليها تعمل لتحب عليه أما هاو لقات العكس شخصيتو قوية و عندها حضور

"ملكة يزي معاش تخمم هكا هذاكا يوري فيك في وجه السوق لازمني نهرب و نرتاح "

بدات تقرب من الكرهبة فرحانة باش تهرب مع كل خطوة تقدمها كلام شيخ عمر دور في مخها

"ملكة فاش قاعدة تعمل راك تلعب بالنار من وقتاه بديت تخمم هكا بعد ما أهلك قروك و ربوك تجي طيحلهم روسهم في التراب و تهرب ..ملكة ركز روحك مليح ...ملكة متنساش إلي سامح موقفش معاك وقت إستحقيتو ....."

تحكي بينها و بين روحها ضميرها يأنب فيها قص عليها صوت سامح بالكرهبة و هو يزمر عليها

-ملكة فيسع أطلع معاش وقت

ضيقت عينيها و غزرتلو بكل قوة

-سامح إيجا معايا نحكو مع بابا باش يعرسلنا

-خلينا تو نبعدو و إمبعد تو نجو نحكو معاه

-ههههههه

-ملكة شبيك تضحك

غزرتلو بمحقرنية و رجعت علي طريقها للدار خلاتو ينادي عليها و يزمر بالكرهبة ....

رجعت دخلت من الشباك و شدت فرشها درجين و تسمع في الباب يدق

-تفضل

-صباح الخير بنتي

-صباح الخير أمي

-ملكة بنتي العرس مازالو أقل من جمعة  و أنت مشريت شي تحبش نخرجو نشرو شوي قضيات

-باهي أمي خليني نبدل دبشي و نمشو

-باهي بنتي هاو الفطور حاضر

خرجت أمها و تربعت علي فرشها "يا ربي عاوني زعما كي رجعت مغلطش زعما نجم نعيش معاه هالشيخ الماسط أوووف يا ربي إنشاء الله ميخنقنيش و يخليني نعيش علي راحتي "

لبست سروال دجين و مريول نص و صندال و خرجت تفطر مع أهلها

-صباح الخير بابا

-صباح الخير يا عروسة

هبطت راسها حاشمة

-ملكة باش تخرج هكا

-إيه بابا فما مشكل

هبط راسو و سكت ميحبش يزيد يضغط عليها أما زادا ميحبش الناس تحكي عليهم معرسة بشيخ و تلبس هكا ...ملكة كانت تغزرلو و فاهمتو فاش يخمم محبتش تتكلم كملت فطورها و فادة متحبش الخنقة تحب تعيش كيما الناس الكل

مشات لبيت أمها و بقات تقلب في الخزنة يمين و يسار لين دخلت عليها أمها

-ملكة باش تعمل

-نلوج علي حاجة مستورة نلبسها

-هذي ملكة ولا أنا غالطة

-أمي موش وقت كلام تو راو إجا شوفلي حاجة نلبسها

-ربي يبقي عليك الستر يا بنتي متعرش قداش فرحانة بيك كيف هداك ربي و باش تلبس حاجة مستورة

-مانيش مقتنعة راو أما خاتر بابا حسيتو متقلق

-بوك عندو برشا متقلق أما محبش يقلك باش متكرهوش يعرف طبعك صعيب

تبسمت ملكة و هبطت راسها متحبش تحكي

الحلقة 8:

كان في السوق يشري في شوي قضيات لدارو باش تكون مريقلة في العرس واقف يشوف في فرش للسرير روج يهبل يغزرلو و مهبط راسو يستغفر ميحبش مخو يهزو للحرام لين يسمع في صوت مرا تكلم فيه

-شيخ عمر

-السلام عليكم عمتي نجاة لباس عليك

-الحمد لله وليدي أنت لباس

-الحمد لله نشكروه و نحمدوه

مرة يهز راسو و مرة يهبطو موش مركز معاها برشا لين يسمع في صوت حنين

-أمي خلينا نمشو معاش وقت علينا

هز راسو يغزرلها مصدوم لابسا جلباب أكحل و فولارا روز كيما شفايفها عينيها كحل و وجها كي البلارة أبيض غمض عينيه و حلهم موش مصدق حس قلبو رفرف بالفرحة و أخيرا شافها كيما حلم و تمنى

-نخليك يا شيخ

-في أمان الله خالتي

مشاو و هو قعد يغزر من تحت لتحت و يدور في راسو يحب يشوف فما شكون يغزرلها غيرو ولا حس بالغيرة خاتر يعرف أنو هي عندها حاجة تجذب أي شخص

منغير منطول عليكم اليوم كتبان صداق عمر و ملكة حب يعملو قبل العرس بنهارين يحب يحكي معاها علي راحتو منغير ميعمل العيب

وقعو أوراق الصداق و خلوهم وحدهم يحكو

-الحمد لله تو وليتي حلالي و نجم نغزرلك قد منحب

ساكة متحبش تتكلم بطبيعتها موش هاضمتو هالعرس جيست متحبش تحشم عايلتها ...تحس بيدين شدولها وجها و هازلها راسها يغزرلها و يضحك من عينيه فرحتو قد الدنيا فرحان بيها بيهبل

-ملكة نحبك من أول نهار جيت فيه هوني

حلت عينيها مصدومة هي جات هوني عندها 8 سنين يعني ملي مازالت فرخة هو عاشق فيها بالرغم من أنو هو وقتها عمرو 18 يعني العقل مينجمش يستوعب كيفاه يغزر لطفلة صغيرة هكاكا و يحبها

-شيخ عمر نحب نحكي معاك في موضوع خاص

-أحكي ملكة

-بصراحة نحبش تصير بيناتنا حاجة في ليلة ...

-سامحني ملكة أما منجمش أنتي مرتي و حلالي و أنا مانيش مستعد نزيد نحرم روحي منك

-لا عمر عيشك متعذبنيش والله لا نحب يصير شي عيشك خوذ بخاطري لين نتعود عليك و إمبعد ساهل

-سامحني ملكة

خرج و خلاها مصدومة

الحلقة 9:

"وريريريريريري يا حواة يا حواة مصلي علي النبي علي بنتي ربي يحفضها و يحميها وريريريريريري "

متصدرة علي الكرسي لابسة عربي بذهبها و شعرها هابط عليها زاد الكبوس حلاه

 السور معبي بالنساء مفما حتي راجل كان بوها جاء سلم عليها و خرج

دخل الشيخ عمر لابس جبة بيضة و منقص في لحيتو شوي و ساويها بدنو طاغي بكلو رجولية ملي شافتو تفجعت و قلبها بدا يدق بالخوف لين شدت في يد أمها كابسة عليها

-ملكة بنتي متخافش و أعمل كيما وصيتك و بقدرة ربي يصير خير البنات الكل هكا كيفك

-أمي نحبش نمشي معاه نحب نبقي معاكم

-يزي عيش بنتي من الدلول و أسكت راجلك باش يتصدر معاك

هزت راسها و هي تفبري الكلها

وقف جنبها و شدلها يدها و هو يضحك فرحان و أخيرا حلمو تحقق

ركبو في الكرهبة و هزها معاه لدارو محبش يمشو لصالة و الجو هذاكا خايف من العين و ميحبش الناس تشوفها برشا

دخل للدار و هي وراه صوت صياغتها عمل سنفونية  قعد في الصالة و هي بقات واقفة و مهبطة راسها

-ملكة تفضل أقعد الدار دارك

-.....

-ههههه متقليش هذي الكل حشمة

صوت ضحكتو زادت وترتها و ركبتلها الخوف معاش منجمة تاقف علي ساقيها

مشا شدها من يدها و بدا يقود فيها لبيت النوم

-نحب نروح

-ملكة شبيك

-عيشك يا شيخ عمر خليني نروح يفرحك

-أسسسسس معندك وين تروح

قربها ليه و حملها و هي تفبري و دموعها محصورين في عينيها ....

نحالها الكبوس و حطو علي فرش يهز في يديها و يجيب علي شعرها و يغزرلها كلاها بعينيه

-خليني نعاونك باش تنحي صياغتك

-لا لا عيشك متعملش فيا هكا منحبش خليني نروح

متكلم حتي كلمة و قرب منها ينحيلها في صياغتها و هي تبكي و مغمضة عينيها خايفة

خلاها في ملابس داخلية و سيبها مشا فتح الخزنة و جبد منها جبة تاع صلاة لبسهالها و شدها من يديها

-خلينا نتوضو و نصلو

-م منعرش كيفاه

-تو نعلمك تبعني و ركز معايا برك

قعدها علي الفرش و بدا يفهم فيها و هي مركزة مع كل كلمة يقول فيها و كيفاه يفسرلها حستو يحكي بكل حب لين خلاها هي زادا تحب تصلي

-لحظة ملكة قبل منبداو نحب نسألك

-تفضل

-مستعدة تكون مرتي بالفم و الملا

سكتت شوي تخمم و تذكر في كلام أمها كي توصي فيها باش تخلي راجلها يقوم بواجبو و متحرموش باش ميكرهاش

-إيه مستعدة

تبسم و باسها من جبينها

الحلقة 10:

كملو الصلاة و قعدو يدعو في ربي باش يسترهم و يجعل حياتهم سعيدة.....

قرب منها و حطها علي الفرش و هي خايفة شادة روحها بالسيف قريب تبكي و بدا.....

بعد عليها مفجوع

-عمر شبيك

-ملكة نسألك و تجاوبني بصراحة

-أي فجعتني راك

-عملت علاقة قبل مع طفل

-علاه تسأل

-خاتر ...خاتر  مفماش دم

-عمر والله معملت شي والله

هز يدو الفوق باش تسكت

-صادقة منغير متحلف

خرج من البيت عمل دوش و قعد تحت الماء يحب يبرد دمو .حاس النار شاعلة فيه عينيه حمر حابس دموعو بالسيف ليلة فرحو يصير فيه هكا

قعدت هي في البيت تغزر لروحها و مصدومة موش مصدقة إلي صار كيفاه صار هكا متأكدة بلي هي مصار معاها شي

خرج عمر من الدوش هز تلفونو و كلم أمها باش تجيه .ملكة كانت تسمع فيه و مصدومة موش مصدقة فاش قاعد يعمل حاجة بيناتهم فاش قام يعاود فيها لعايلتها

شوي و دق الباب

مشا فتحو و دخلهم

-شيخ عمر فهمنا شصار

-الحقيقة بنتكم ..منعرش كيفاه باش نفسرلكم أما نحب نعرف إذا صارت معاها حاجة قبل كي كانت صغيرة ولا

-منعرش شنوا باش نقلك يا شيخ منعرش سامحنا علي هالموقف أما منعرش خليني نشوفها بالكش تخاف و تحكيلي

دخل بوها عليها و هي لابسة جبة طويلة و قاعدة علي الفرش تبكي مسندة ركبتها و متكية راسها عليها

-ملكة

ملي سمعت صوتو ترعبت بالخوف

-با بابا

-شنوا الكلام لسمعتو قلي تطلعش عاملة عملة

-والله يا بابا لعملت شي والله

-سكر فمك و قول الصحيح مفماش حاجة منغير سبب تكلم

-والله يا بابا والله لعملت شي والله شنعمل باش تصدقني

-يا هاملة تحب تفضحنا قدام الناس تفوه علي ربايتك تفوه

شدلها شعرها و قعد يضرب فيها لين سمع عمر الحس دخللهم

-سامحني عمي ملكة مرتي تو و معندكش الحق تضربها أنا راضي بيها و مستعد نستر عليها

تغزرلو و مصدومة فيه شنوا لباش يسترو و هي طول عمرها محافظة علي شرفها

-شيخ عمر الطفلة ولات عندك أعمل فيها لتحب أنا تبريت منها

خرج بوها و أمها خلاوها تبكي  محروقة

الحلقة 11:

دقيقتين بالوقت بعد مخرج بوها و أمها من دارها يوصلها ميساج هزت التلفون بجنبها و فتحتو لين تحس بيه تخطف من يدها..

يغزر للتصاور و مصدوم موش مستوعب فلي يشوف فيه هذي ملكة حبيبت قلبو مصورة مع طفل تصاور فاضحة محبش يزيد يركز فيهم و بعد التلفون من عليه

-ملكة شنوا هذا

-شنوا؟؟

عطاها التلفون و وراها تصاور ملي شافتهم شهقت

-عمر

-ملكة عيشك كلمة لا يزيني مشفت

-عمر أفهمني

-فامك ملكة أما تو موش وقت كلام غدوى إنشاء الله نحكو و نتفاهمو

خرج و خلاها في البيت وحدها و سكر عليها الباب قعدت علي السرير منهارة لين تحل الباب

-وينو التلفون

-أما تلفون

-تلفونك

-أهوكا

خذاه و رجع خرج و سكر الباب

سوايع معدودة لين جاء الصباح كانت ليلة مشومة عليهم الزوز مذاقوش فيها النوم هو ملي خرج قعد يصلي و يستغفر في ربي و يطلب في الصبر و هي تبكي محروقة خايفة برشا و قلبها واجعها

البيت ظلمة محستش بالوقت كيفاه تعدا توا 12:00 و هي محبوسة وسط البيت

"ياربي زعما قداه الوقت  تو بففف جعت معاش نجم شبنعمل يا ربي كيفاه باش نقلو جعت بعد إلي صار... لا لا سايا لازم ندق علي الباب خليني ناكل باش ندوخ بالجوع. "

قعدت دق علي الباب لين فتحلها

-نعم ملكة فما حاجة

-جعت

-هوكا الكوجينة قدامك طيب لتحب

-م منجمش نطيب

-تو نطيبلك أنا

مشا للكوجينة و هي تبع في كل حركة يعملها ..يطيب في مقرونة و هو ساكت كلمة لا ميحبش يحكي معاها بعد إلي صار

-شيخ عمر قداه الوقت تو

-12:10

-ياخي أهلي موش جايين

-أهلك تبرو منك يا ملكة في الدنيا هذي مازال عندك كان أنا ننصحك متغلطش و إلا راك باش تبقي وحدك

لمت روحها في الكرسي و عقدت حواجبها أكثر حاجة تكرها هي أنو تبقى وحدها ديجا عدات الليلة وحدها كان بالسيف

الحلقة 12:

خرج عمر من الدار يعمل في دورة علي رزقو و كمل أذن في الجامع و روح في اليل يلقاها قاعدة في الصالة تتفرج في كليبات و لابسة روبة قصيرة عرية و مسيبة شعرها منظرها كان مغري برشا بالنسبة ليه مينجمش يقاومو شاد روحو بالسيف عليها

-ملكة

-شيخ عمر شبيك بطيت لتو

-كنت في الجامع

-أي باهي

-مفماش عشاء

-الحقيقة أنت تعرف أنو أنا نجمش نطيب...

-باهي

دخل لبيت النوم و خلاها قبل متكمل كلامها بدل دبشو و مشا للكوجينة كلا ماكلة خفيفة و رجع للصالة كي شاف الأغاني أستغفر ربي و هز منها الكوموند

-ياخي هاذم وقتاه صبيتهم عادي بروحي مفسخهم

-قبيلة صبيتهم

-معاش نحب نشوفهم واضح

-واضح

-و عيشك أمشي ألبس حاجة مستورة منحبش نشوفك هكا كي نكون أنا البرا ألبس ألي تحب

-ظاهرلي أنا نلبس هكا قدام راجلي

-كان جيت بالرسمي تعتبرني راجلك متخونش ثيقتي فيك

-عمر راك غالط والله معملت شي...

-سايا ملكة الموضوع هذا معاش نحبو يتجد بيناتنا

-باهي علي راحتك أما نحب نعرف علاقتي أنا وياك شنيا

-إحترام متبادل تسمع كلامي و رد بالك تعمل حاجة أنا قتلك عليها لا و أهم حاجة هي رد بالك تخرج من الدار و أنا مفيباليش الخروج لازمو يكون كان معايا

-شنوا أخر

-حاول تتجنبني شوي خاتر منحبش نشوفك برشا في الدار و تعلم التطييب لوقتاه باش تبقي هكا

-باهي إنشاء الله

مشات لبيت النوم و هي تبكي و مخنوقة هذا إلي قبل العرس كان يجري عليها و تو بعد حكاية غالطة كرها و بعد عليها

عمر كان وحدو يخمم فلي صار حاسس روحو برد معاها كلي معاد تعنيلو شي بعد إلي صار هي وصلت هانتو في شرفو مستحيل كان ينجم يرجع يحبها كيما قبل ...يخمم و يخمم لين رقد هي كانت خايفة في البيت وحدها وين طلت عليه في الصالة لقاتو راقد حملت مخدتها و رقدت قريبة منو و هي علي السطح البرد كلاها و مسلانها وجعها.....  تسمع في صوت تلفونو ينوقز ظاهر معدلو علي الأذان حملت مخدتها و هربت لبيت النوم باش ميشوفهاش

قام هو توضي و خرج قعدت هي في البيت فايقة موش منجمة ترجع ترقد لين تسمع في يأذن حست كلي الصوت زعزعها هزتها ساقيها منغير متشعر للدوش توضات صلات حست روحها إرتاحت

الحلقة 13:

مشات للكوجينة طيب في قهوة ليه و ليها لين دخل

-صباح الخير شيخ عمر

-السلام عليكم

-تفضل هاو فطورك حاضر

-كمل أفطر أنتي تو منبعد نفطر أنا

هبطت راسها فهمتو ميحبش يقابلها ولا يشوفها

-أنا باش نفطر في بيت النوم أفطر أنت هوني

هزت كاسها و مشات خلاتو مصدوم فيها كيفاه فهمتو تبسم و قعد يفطر

دخلت للبيت حطت الكاس علي جنب و قعدت ظامة ساقيها لبعضهم و تبكي

"يا ربي علاه صاير فيا هكا يا ربي راني مضلومة يا ربي عاوني و أسترني.... "

تبكي و تتغصور وحدها لين تسمع فيه خرج و سكر الباب هزت روحها للكوجينة تلقاه الفطور كيما هو تنهدت و كبت القهاوي و غسلت الكيسان هي بيدها موش منجمة تفطر

ساعتين من الزمان و تسمع في الباب يدق ..مشات طول حلتو و شعرها معري تلقاه عمر و أمها

-أمي مرحبا بيك تفضل

قربت منها باش تعنقها لين حست بيديها صادينها تبسمت و جبدت روحها

-ملكة أمك جبتها باش تعلمك كيفاه طيب

-باهي مرسي

مشا عمر و دخلت أمها طول سألتها علي الكوجينة ورتهالها و قعدت تعلم فيها كيفاه طيب هذا الكل مسألتهاش حتي علي حوالها و كيفاه عايشة

-أمي وينو بابا لباس عليه

-الحمد لله

-سلملي عليه و قلو راو بنتك توحشتك برشا إيجا طل عليا

-بوك متبري منك و أنا كيفو ميمشيش في بالك جيت لهوني محبة فيك لا رد بالك تخمم هكا خاتر كان موش ماخذة في خاطر راجلك والله دارك لا ندخلها

خرجت أمها و خلاتها حالة عينيها مصدومة قداه قلبها معبي عليها تنهدت و حضرت الطاولة باش كي يروح عمر يلقاها حاضرة.. قعدت تستنى فيه لين روح و هي شاردة في عالم أخر قص عليها كان صوتو كي قال سلام

ملي سمعتو قامت من بلاصتها باش تخليه علي راحتو لين قلها أقعد

-نعم يا شيخ فما حاجة

-اليوم كي حليت الباب شعرك كان معري و الحاجة هذي معاش نحبها تتعاود واضح

-واضح

-و حاجة أخرا مذابيك تتعلم التطييب فيسع أمك موش حابة تجي هوني خاتر

غزرلو في عينيه و مشات لبيت النوم و هي تكر في ساقيها كارها روحها و موش حاملة تزيد تبقي نهار في الدار هذي أما معندها وين تمشي لازمها تتحمل

الحلقة 14:

جمعتين تعداو متبدل فيهم شي كل يوم أمها تجيها تعلمها و تروح في الليل ترقد علي السطح بجنبو لين مرضت

تسمع في الباب يدق و هي راقدة في فرشها موش منجمة تقوم تهز في روحها بالسيف

-سلام أمي تفضل

دخلت أمها مشات الكوجينة و هي تبع فيها راسها رزين و حاسة بالبرد كلاها كل مرة تمشي للبيت تلبس حاجة باش دفيها بالرغم من أنو الحال صيف أما هي كانت جامدة بالبرد أمها كانت فاهمتها أما محبتش تحكي معاها كان قبل متروح عملتها تيزانة سخونة و قتلها بلي اليوم أخر نهار نجيك فيه و روحت

شربت ملكة كاسها و مشات لبيتها رقدت  ..روح شيخ عمر للدار يلقي الحس بايت كان الطاولة حاضرة و ملكة ريحتها مفماش قبل كانت تستناه علي الطاولة أما اليوم ملقاهاش تبسم و حس روحو مرتاح قعد ياكل و يتبنن حاسس روحو علي راحتو أما قعدت ملكة شاغلة بالو زعما وينها

مشا لبيت النوم يلقاها راقدة و فوقها 5 كواتات و هي ترعش بالبرد

-ملكة لباس

-عم عمر

-ملكة شبيك

-بردانة

-لحظة نجيبلك حرابش تاكلها تو تحس روحك خير شوي

خرج جابلها دواء و هو مربوث خايف عليها شربهولها و رجع غطاها هو جاء باش يمشي لين يحس فيها شادتو من يدو

-بردانة أبقي بجنبي

تحل في عينيها و تسكر بالسيف منجمش يقاومها أستغفر ربي و دخل معاها للفرش و قعد محملها و هي مكبشة فيه زوز مرتاحين مع بعضهم هي رقدت و هو قعد يمشي في يديه علي شعرها و يشم في ريحتو إلي حسها تغلغلت فيه

كي حسها رقدت خرج و خلاها باش ترتاح مشا شرالها شكلاطة و شوي فازات باش تاكلهم فماش متقوم لباس و تشد صحتها

قامت هي في العشية مخر راسها رزين تهز في روحها بالسيف قصدت الكوجينة باش طيب العشاء لين تلقاه يطيب و يصنف حالة فيه تبسمت و حملتو من ظهرو تعنكشت فيه

-سامحني تعبتك معايا

حس بروحو لبو العرق و بدنو تكرهب من قربها

-ملكة لباس تو

-أي لباس

حطت راسها علي ظهرو و زادت كبشت فيه ريحت الرجولية طاغية و بدنو العريض إلي ذوبها تحسو بالحق راجل قبل كانت الحاجات هذي الكل متهتملهاش خاصة فيه هو كان ميعنيلها شي أما اليوم متعرش شبيها ضعيفة قدامو يمكن خاتر قبل كانت ديما هي المسيطرة في العلاقة أما اليوم لقات العكس راجلها عربي أصيل الغيرة و الخوف و طاعة ربي الكل موجودة فيه ....

الحلقة 15:

شدلها يديها و بعدها عليه قعدها علي الكرسي

-شبيك قمت و أنتي في الحالة هذي لازمك ترتاح

-نستخايل بنطيبلك العشاء

-كي تكون مريضة متعمل شي في الدار باهي

-باهي

كملو تعشو و قعدو يتفرجو في التلفزة لين ضربو النوم و رقد سكرت هي التلفزة و جابت مخدتها و رقدت كي عادتها علي السطح

راقدة و حاسة حاجة واقفة قدامها فتحت عينيها بشوي راسها يوجع موش منجمة تثبت تحس كان بيدين جبدوها الفوق بقوة

-شنوا هذا ملكة موش علي أساس مريضة تو جايا ترقد هوني علي السطح

-ن نخاف منحبش نرقد وحدي

-مريضة راك لازم تتحمل

-نخاف

-الله لا يعطينا ما يغلبنا إيجا تو نرقدك معايا

-باهي

حملها و تكاها عندو علي الفوتاي

-علاه منمشوش لبيت النوم أرتح

-منحبش

-باهي

مرقدها عندو و كابس عليها موش منجمة تتحرك كانت مرتاحة معاه رقدت طول و هو قعد يتبسم و يحكي بينو و بين روحو "أه يا ملكة شنوا عملت فيا زعما كلامك صحيح و مصار معاك شي أما التصاور كيفاه باش نكذبهم و زيد هذاكا هو الطفل لكنت مصوحبتو  يا ربي صبرني وكهو "

قامو الزوز علي صوت تلفونو ينوقز ...العين في العين  و القلب يدق موش منجمين يتحركو في عالم أخر

-ص صباح الخير شيخ عمر

-نهارك زين

-معاش وقت عليك

-أه أي لازمني نقوم

قام  بالسيف قلبو موش مطاوعو يخليها و يمشي أما طاعتو لربي أهم ببرشا

في العادة كان يخرج من غير فطور كان كي يروح يفطر أما ملكة مطاوعهاش قلبها تخليه يمشي أكاكا حظرتلو كاس حليب بالعسل و شربتهولو

-ملكة حضر روحك

-علاه

-باش نزورو أهلك

-أهلي متبريين مني منحبش نمشي

-هاو معاش باش ترجع هوني باس نمشو للبلاد وين أهلي و ناسي

-محكيتليش عليهم و زيد محضر حد للعرس

-تو موش وقت كلام تو كي نروح نحكو

خرج و خلاها تتغصور وحدها خايفة من مواجهة بوها

الحلقة 16:

لبست نقاب لقاتو في الخزنة و حمرت و مكيجت و قعدت تستني فيه لين روح

-نمشو تو

-سلم الساعة و إمبعد ساهل

-سامحني شيخ عمر

-هاك لبست نقاب

-أي لقيتو في الخزنة

-أي باهي هاك وليت تعرف شنوا نحب منغير منقلك

هبطت راسها حاشمة

-نحي الغطاء من علي وجهك مناش البرا باش تغطيه

هزتو و بان وجها منو بالحكل و الروج

-شنوا إلي عاملتو في وجهك

-حبيت نعمل مكياج كي العرايس الكل و زيد هاو أنا البرا لابسة نقاب ميشوفني حد

-ماشيا تقابل بوك راو موش ماشيا لعرس فيسع نحيه

-عيشك خليني....

-قتلك نحيه

دخلت الدوش و بقات تغسل في وجها و ضاربها الغزول

-هاو سايا

-مازال عينيك بالكحل

-هذاكا حد الجهيد موش عاجبك نحيه أنت

قربها ليه و لوالها يدها وراء ظهرها

-أخر مرة تعلي فيها صوتك عليا والله المرة الجاية تروح لدار أهلك مطلقة و تو فيسع نحي إلي في عينيك

هبطت راسها و سكتت مخنوقة تهز في يدها و تمسح فيه لين عينيها حمارو و رموشها بداو يطيحو

-يزي خير متعمي عينيك

خرج و هي خرجت وراء مطبسة راسها حزينة خايفة من المواجهة إلي باش تصير بينها و بين عايلتها

دقو الباب و بقاو يستناو لين فتحولهم

-السلام عليكم

-و عليكم السلام و رحمة الله و بركاته ولدي تفضل مرحبا بيك

دخل و هي وراه

-عسلامة بابا

دور وجهو و مشا محبش حتي يحكي معاها

دخلت تلقى أمها واقفة تستقبل في راجلها ملي شافتها هي زادا دورت وجها

قعدت جنب راجلها مهبطة راسها كلمة لا تسمع كهو

-عمي أنا و ملكة باش نمشو للبلاد باش تصير قسمة أرض و زيد ناوي نعيد غادي هذاكا علاه جينا اليوم باش نودعوكم

-ربي يرضى عليك وليدي إنشاء الله توصل بالسلام

-يسترك عمي و ملكة تهنى عليها في الحفظ و الأمان

-بالسلامة وليدي

خرج عمر و ملكة بقات واقفة في البيت مقابلة بوها و أمهم

-أمي أنت مصدقة ألي أنا ممكن نعمل حاجة غالطة كيما هكا

-بطيشك هذا نتوقع منك كل شي

- و أنت بابا

-لاني بوك و لا نعرفك من صغرتك موش متربية و مذابيا معاش نشوفك

-سامحوني تعبتكم معايا أما تو يجي نهار و تعرفو الحقيقة وقتها تنجمو تحكو تو باش نمشي و نخليهالكم واسعة و عريضة تنجمو تتجاوزو الماضي و تعتبرو رواحكم معندكمش طفلة أسمها ملكة... حاجة وحدة نتمناها إنشاء الله كان أنا وصلت عملت حاجة غالطة تبان فيا و كان سامح تبلى عليا إنشاء الله تبان فيه بالسلامة

خرجت و هي تبكي مقهورة اليوم بالرسمي حست روحها وحدها

الحلقة 17:

البلاد العربي و الريف المزيان بلاصة الكلها مغروسة و الريحة الفاوحة تنفست مليح و تبسمت

-عمر باش نسكنو هوني

-أي

-ديما ولا مؤقت

-نعرش يعمل ربي دليل

-محلاها العيشة هوني

-أي

قعدو يحكو طريق كامل و حكالها علي عايلتو كيفاه توفاو و رباه جدو و و و لين وصلو

-عمي جمال ههههه ليك وحشة

-عمر وليدي لباس عليك صحتك لباس هالغيبة لا تقول نطل و لا تسأل علينا

-عندك الحق يا عمي ماك تعرف بعد وفاة جدي تصدمت منجمتش نبقى هوني

-عندك الحق وليدي أما هاك كلي وليت مدين مشاء الله ربي يباركلك

-يسترك عمي

-أاا عمر شكون هذي لمعاك

-ااا هذي مرتي

-سلام بنتي لباس عليك صحتك لباس

-لباس عيشك

دخلو و عموماتو و خالاتو يزغرطو فرحانين بيه و بجيتو نهار كامل و الكسكسي يطيب و الميعادات مبطلتش و هو فرحانين بملكة و البنات الكل دايرين بيها عاجبهم زينها و كلامها

-أاا صالحة بنتي بري حضري بيت لولد عمك عمر يبات فيها

-لا عمتي باش نمشي لدارنا

-لا وليدي كيفاه ميجيش منو هكا و زيد الدار عندها قداه مسكرة مليانة كان بالغبابر

-تو نظفها أنا و ملكة

-لا والله مصارها وليدي ملكة مازالت عروسة جديدة ميجيش تقضي تو نبعث البناويت يقدوهالكم

-عيشك عمتي ربي يسترك

تجارت البناويت و الفرحة ماليا عينيهم ينظفو في الدار و يزينو فيها و النساوين شادين ملكة بالحديث علي أهلها و حياتها و إذا كانت حبلة ولا

بعد جوجما دامت لنص الليل روحت ملكة و عمر لدارهم إلي هي دار بوه و أمو عبارة عن حوش عربي فيه زوز بيوت و كوجينة و دوش بيت صغيرة و باين قديمة حيوط مقشرة و سطح كان سيمان

-عمر باش نعيشو هوني ياخي

-أي شنوا موش عاجبك

-لا لا إلي تعملو مبروك

-أدخل

-وين

-للبيت

-أناهي منهم

نفخ بالقوي و خلاها واقفة و دخل .أول مشاف البيت بقي مصدوم بكلها ورود ياسمين و قرنفل ريحتهم فاوحة مكانش فما شرير أما كان فما جراري قراب من بعضهم في تركينة مزين بكلهم    ملي شافتو ملكة شهقت

-أه محلاها البيت تهبل دخلت و خلاتو واقف في الباب نحات النقاب من علي وجها و تكات علي السرير

-يا عمر إيجا شوف القعدة هوني محلاها

تكا بجنها و تبسم هو زادا عجبتو ذكرتو بحياتو قبل كيفاه كانت

الحلقة 18:

-عمر

-أممم

تكات علي صدرو و بدات تحكي معاه

-علاه منكونوش كيما العرايس الكل هاو أنا قبل العرس مكنتش نحبك و تو لقيت راحتي معاك

-شتقصد كي العرايس الكل

-يعني متفاهمين مش كيما  هكا ديما عرك

-كهو

تربثت و لبها العرق -أي كهو

تبسمت و هزت روحها من عليه سألتو علي الدوش و خرجت تحس بالسخانة طلعتلها و هو قعد يضحك وحدو

"معندك وين تهرب مني الليلة يا طفلة يزيني محرمت روحي مني أنتي مرتي حلالي مفماش علاه نعذب في روحي "

رجعت هي لبيت نوم تلقاه من فوق ملابس شي كان بدنو عريض مكبوس يسحر أصل غمضت عينيها و دارت لجيهة لباب

-شيخ عمر عيشك ألبس مريولك

-حل عينيك و إيجا

-نجمش

-ملكة

حستو تنرفز طول نحات إيديها من علي وجها و قربت منو و هي تلعب بيديها تحب تلهي روحها

-نعم شيخ عمر

-فيبالك بلي المرأة كي يطلبها راجلها و متجيشي حرام عليها

-أي في بالي

-معاناها متكسحش راسك برشا باهي صغرونتي

-يعني أنت باش ...باش...

-أي

-موش وقتو تو أنا تاعبة و بنرقد

-ملكة

-باهي باهي

قربها لين و نحالها حجابها خلالها شعرها هابط علي وجها

-ملكة خلينا نبداو صفحة جديدة في حياتنا و ننساو الماضي حتي لو أنتي غلط ميسالش ربي كريم و تو يسامحك شوكني أنا باش منسامحكش

-عيشك عمر

تعدات الليلة بيناتهم بكل رومنسية و صفات القلوب و توحد حبهم ❤❤❤

الحلقة 19:

صباح جديد قامت تلقى روحها محملتو تغزرلو موش منجمة تهز عينيها من عليه فرحانة بيه أكثر من الدنيا الكل

-حبيبي قوم

-أمممم

-عمر قووووم

-يا روحي خليني نزيد نرقد شوي

-عمر قوم لازم نصلو معاش وقت

-أي يا روحي عندك الحق

-باهي قوم باش نجم نقوم أنا

-ههههه يا طفلة ياخي شبيك أنتي تي إمبارح ليلة كاملة و أنتي مارجتني متحبنيش نشعل الضو للدرجة هذي حاشمة مني راجلك راني

-باهي أسسس و أخرج متزيدش تحشمني

-هههه باهي مريتي الصغرونة

خرج يتبسم و هي طول عنقت المخدة فرحانة و حاسة روحها خفيفة

بدلو دبشهم و مشاو لدار عمو باش يفطرو غادي

-صباح الخير يا عرايس لباس عليكم رقدتو مرتاحين

-أي عمتي عيشك

عمر مشى قدا الرجال و ملكة قعدت مع النساوين لين دارو بيها بنات عم راجلها

-ها ملكة وجهك منور شفما

تبسمت و هبطت راسها حاشمة

-والله يعطيك الصحة كيفاه عرستي بيه بناويت الدشرة الكل حبو ياخذوه أما هو مغزرلهمش

عقدت حواجبها غايرة موش طايقة الكلام إلي سمعتو

-ها بناويت سيبوها لواه تمرجو فيها مسكينة خلوها رايضة مع راجلها

ملكة كانت تخمم في عمر كيفاه حبها ملي مشى للمدينة مغزرش لغيرها و حبها بالرغم من تسيبها و هملها و هذا الكل كان ينجم ياخو وحدة من بنات بلادو متربيين و دبشهم محترم

منغير منطول عليكم في أحداث روتينية علاقة عمر بملكة كانت ياسر مزيانة متفاهين و جوهم أحلا جو لين جاء النهار إلي باش يفسد عليكهم فرحتهم

ملكة كان عند مرت عمت عمر كي عادتها مع البنات خاتر هو موصيها باش متبقاش وحدها

-ملكة بنتي شوفي لبسة الرقاصات محلاها

-أي عمتي تهبل والله

-هزيها و دلعي راجلك أمليلو عينيه باش ميشوفش لغيرك

-زعما عمتي خايفتو ميحبش ماك تعرفو مدين

-هذي حاجة بيناتكم بنيتي درا المدينين يموتو ماو حتي هوما عايشين متهنيين و مستورين

-عندك الحق عمتي خليني نمشي نجربها إنشاء الله تجي علي قياسي

-ههه بري بنيتي الله يزين سعدك

روحت ملكة للدار تجري تحب تشوفها تجي قدها ولا

لبسة مخلعة كيما تعرفو لبسة الرقاصات عملت مكياج غامق و سيبت شعرها و قعدت تميل في مسلانها تشطح لين يدق الباب مشت تفتح فيه تعرفو عمر يروح في الوقت هذا...

الحلقة 20:

-س سامح

-ملكة نحبك أرجعلي يا ملكة نوعدك نعرس بيك و منخليك بعدك عذبني

-أخرج عليا جايني هاد عليا في داري والله متحشم

دزها الداخل و بدا يقرب منها

-ملكة قلي راو راجلك ممسكش بعد مشاف التصاور قلي ملكة فرحني عيشك

-أخرج عليا

-ملكة عيشك رتحني من عذابي قلي مسك ولا

قص عليهم صوت عالي و خشين

-إيه مسيتها ملكة مرتي شرعا و قانونا

قرب عمر منو و ضربو في وجهو و دزو البرا و رجع لملكة و هو يصفق بيديه

-يعطيها الصحة مرتي الغالية مدخلتلي الرجال لداري و هي مخلعة كي الرقاصة لا موش كي الرقاصة هي رقاصة علي حالها

-عمر متفهمنيش بالغالط والله كنت..

-أنتي طالق أنتي طالق أنتي طالق

هبطت علي ركايبها تبكي و تترجى فيه باش يسامحها و هو قلبو كاسح حجر كان يغزرلها بكل إشمئزاز متقزز منها

-حضر روحك باش نروح بيك لدار أهلك

-عمر أهلي متبريين مني عيشك متعملش فيا هكا خليني عندك

-الكلام لعندي قلتو

-باهي خلينا نمشو غدوا تو الليل قريب يطيح ميجيش نهدو عليهم في الليل

قحرلها و خرج قدام الحوش واقف قدام الصور و يضرب فيه بكل غل لين إيده سال منها الدم و تنفخت "علاش يا ملكة علاه تعمل فيا هكا علاه بعد مسامحتك تجي تخوني يا ملكة راك خنتني و مسيتني في شرفي تي أنا منحملش نشوف شعرة خارجة من حجابك قدام الناس خلي عاد كان يشوفوك مهدعة هكا .."يبكي بحرقة مخنوق حاسس روحو ضايع وحدو في الدنيا هذي موش منجم يستوعب إلي صار لحظة و تصب عليه المطر في عز الصيف تقولش عليها تبكي علي حالهم

كي حس روحو برد شوي دخل للبيت لقاها لابسة حجابها و محضرة شنطتها تستنى فيه

-كان تحب نحيه الحجاب بعد اليوم ماكش مجبورة باش تسمع كلامي في حتي شي الله يهديك

ساكة و مهبطة راسها كان دموعها سبالة قبل كان عندها عمر في حياتها أما اليوم لقات روحها وحدها في دنيا ظالمتها طول و عرض أما متنجمش تلومو هو مدين و ألي شافو برك يخليه يطلقها عندو الحق حتي هو ديما ينبه فيها باش متروحش للدار كان معاه و زيد موصيها كي تفتح الباب و لازمها تلبس حجابها

الحلقة 21:

خطف الكرهبة و قصدو ربي طريق كامل و هو ساكتين و هي من الخوف وجها ولا أصفر معدتها مقلقتها

-عمر عمر عيشك أقف حاسة روحي نحب نتقيء

وقف الكرهبة علي جنب مدلها دبوزا ماء و هبطت تتقئ علي قوتها لين فشلت و رجعت للكرهبة

-سامحني عطلتك

قحرلها و رجع يسوق و هي باقي نفسها ضايقة حاستها مقلوبة

-عمر أقف عيشك

رجع وقف و هي مشات تجري ترد و شادة معدتها إلي قريب باش تخرجها هذا الكل و هو لا علي بالو ميحبش حتي يغزرلها بشطر عليه ....رجعت للكرهبة تهز في روحها بالسيف وجها أصفر و متقلقة تكت راسها علي الكرسي لين تسمع في صوتو يتكلم

-أطلع من تالي راك نفختلي الكرسي بالماء و التراب

-سامحني

هبطت و طلعت من تالي متكي راسها و عينيها مليانين بالدموع وجيعة بدنية و نفسية خايفة من مستقبلها المجهول معندها حتي فكرة شنوا ممكن يصير معاها

-عمر

-الله لا يعطينا ما يغلبنا تفضل

-تو أحنا سايا طلقنا

-أي

-خلينا نرجعو نعرسو

-تو معاش ينفع الندم راك مخليت معملت باش مسيتني في رجوليتي بديناها بليلة دخلتنا لليوم و أنتي كل مرة تعملي عملة تهبلني

-عمر نحبك متخلينيش

شد فران لين تضرب راسها في الكرسي لقدامها

-تزيد كلمة أخرى نهبطك هوني

حلت عينيها و شدت معدتها تبكي بالصوت

-عمر باش نموت عمر

-قتلك كلمة لا

غزرلها باش ينبه عليها يلقاها تبكي و وجها أصفر شادة معدتها تعيط بالوجيعة تفجع عليها هزها طول للسبيطار بحكم هوما سايا وصلو

-مبروك المدام حبلة

-حبلة؟؟؟؟

-لازمك تهتم بيها و متوترهاش خاتر الصغير مازال موش راكح و أهم حاجة الراحة النفسية خاتر لولا شوي كنا فقدنا الصغير

-إنشاء الله

"يا ربي شبنعمل تو سبحان الله كل مرة تصير حاجة تزيد تخلينا قراب لبعضنا يا ربي هذا إبتلاء ولا رحمة من عندك راسي باش يتكسر شبنعمل تو كيفاه باش يعيش الصغير و أحنا مطلقين لازم نرجع نعرس بيها  و منخليش ولدي يتيتم كيما صار فيا "

كان يبكي محروق ميعرش علاه يبكي بالضبط أفكارو داخلة بعضها

الحلقة 22:

-ملكة لباس تو شتحس في روحك

-لباس الحمد لله

-في بالك بروحك...

-شنوا ؟؟؟

-ملكة أنتي حبلة

وجها صفار و عينيها تحلو مفجوعة

-متخمم برشا باش نرجعو نعرسو حيست خاتر الصغير باش ميتيتمش و يتحرم من عايلة

-باهي

عدات ملكة الليلة فم و عمر بقى معاها .الصباح كي جاو خارجين يشوفو في سامح مدخلاتو الحماية عامل أكسيدون و بكلو بالدم ملكة غزرتلو و تبسمت ربي عطاها علي قد قلبها هي عطاها ربي حياة جديدة ببيبي و هو حياتو وفات.. مركزتش برشا معاه و مشاو للمحكمة ريقلو أوراقهم و جددو عرسهم و رجعو لدارهم القديمة

سمو بسم الله و دخلو

-عمر جعت

-هوكا جبت معايا باش طيب

-وين

-في الكرهبة بقت واقفة في بلاصتها متحبش تخرج من الدار

-ميسالش تجيبهملي أنت

-من تو بديناها بالتعب أصلا أنتي ميجي من وراك كان التعب طفلة مسخ...

حس روحو غالط كي قال هكاكا كبس يديه و طلب السماح و هي متكلمتش .دخل القضية و الدبش و هي مشات للكوجينة طيب في كسكسي شتاهو و زيد تحب تعملو كيما تعملو مرت عم عمر

تقص في البصل و تبكي مكانتش تبكي علي البصل لا بالعكس كانت تبكي علي كلمة مسخة حستها ضربتها في قلبها قد قد

كملت حضرت الطاولة و نادتو باش ياكل قعد مقابلها و حاسس روحو فادد و لايم علي روحو كيفاه قلها هكاكا بالنسبة لملكة كانت تاكل بكل روح فيها مسيبة غلها الكل في الماكلة تحب تنسى المشاكل و تتلهى بروحها و بولدها

وقيت نوم و ملكة كانت في فرشها تستنى في عمر باش يجي يرقد أما هو شي حتي التلفزة تسكرت و هو مجاش لين خرجتلو

-عمر باش تجي ترقد في البيت ولا

-لا

-باهي

مشات جابت مخدتها و رقدت علي الكرسي مقابلتو و هو يغزرلها بشطر عين

الحلقة 23:

شبيك راقدة فم ياخي ضيق عليك ربي باش تقابلني

-نخاف وحدي

-تو مسلانك يوجع

-ميصيرلي شي

-قوم تحرك شد فرشك

-لا

-ملكة قوم

حركت راسها بلا فددتو و وترتلو أعصابو تلفون في يدو طيشو علي الحيط جابو أشطار لين تفجعت

-ملكة تحرك أدخل للبيت متهبلنيش

متعنكشة في الكرسي و ضامة ساقيها لصدرها خايفة و شادة في حجابها

قرب منها و شدها من يدها و كركرها وراه للبيت بالسيف و حطها علي الفرش

-كي نقول كلمة منعاودهاش باهي

-ح حاضر

تكى بجنبها و قعد يغمض في عينيه بالسيف يحب يرقد

-عمر

-شتحب زادا

-ميسالش طفي الضو نحب نقص شوي من دبشي سخنت

-بفففف باهي

-لحظة خليني نشوف حاجة نلبسها الساعة و بعدين طفيه

-تعرف كيفاه أنا هاني مغمض عينيا و أنتي بدل و طفي الضو و حاول الصباح بكري تبدل دبشك منحبش نشوفك هكاكا

-باهي

قامت لبست روبا خفيفة كل شي باين و طفات الضو و رقدت. تتقلب يمين و يسار مجاهاش النوم

-يا طفلة ياخي متريضش عيفتني في روحي لا ترقد ولا تخلي شكون يرقد

-باهي

قام عمر مفجوع تذكر إلي هو لازمو يكلم عمو باش يقلو رانا خرجنا من الدار

-عمر شبيك

-تي تلفون تكسر و أنا لازمني نكلم عمي

سكتت شوي تخمم لين لقات حل

-عمر شوف تلفوني تاعي إلي هزيتو مني أستعملو

-أي والله فكرة

جبد التلفون و مشى للصالة بربش التلفون لمكسر و هز منو البيس ركبها في التلفون أما محبش يتفتح بالع شارج... قعد يشرجي فيه شوي لين تفتح و مشى لبيت النوم

كلم عمو و طمنو عليهم و قعد يبربش في التلفون لين شاف التصاور تعداهم و قعد يستعوذ من الشيطان

-لحظة لحظة فما حاجة غالطة في الحكاية

رجع يشوف في التصاور و يثبت

الحلقة 24:

قام شعل الضو و هز الغطاء من علي ملكة و هي مكبشة فيه

-تي سيب الغطاء

-ملكة قوم

-يا عمر تو نقوم غير سيب

تجب في الغطاء و تفارع فيه و هو شادو لين قرب منها و دزها باش تكات علي ضهرها بعدها شعرها من علي صدرها و قعد يغزر للتصاور و يغزرلها

-تي موش نفس البدن كيفاه مجاتش لبالي هذي

-عمر شبيك ياخي

-أنتي عندك بستخالة في صدرك في التصويرة مفماش

-من لول قتلك راو كذب أما أنت محبيتش تصدقني

-تو قمت تعلي في صوتك بربي أرجع أرقد و نقص عليا حسك

-محسوب بالك راني مية عليك

-ملكة

-تي سيب الغطاء الهم هذا

رماه عليها و خرج خلاها تغزل وحدها... خرج في الطريق و هو يسوق بأقصى سرعة عندو وصل للسبيطار و سأل علي سامح عرف بلي هو توفى

-بربي تعرفش وحدة قريبتو أسمها ملكة

-أي مرتي

-لقينا الورقة هذي في مكتوبو تنجم توصلهالها

-أي علاش لا

-عيشك

هز الورقة و روح للدار طريق كامل و هو مرة يشدها و مرة يسبها خايف تكون فيها حاجة خطيرة

حل الباب و دار باش يسكرو يحس كان بحاجة ضربت راسو

-تي شكون ضربني

شهقت و حطت يدها علي فمها مفجوعة

-أه عمر والله نستخايلك سارق سامحني مقصديش

شعل الضو و قرب منها يغزرلها بكل حقد

-أسمع يا طفلة أخر مرة تعاودها هذي باهي

-باهي

خرج الورقة من مكتوبو و مدهالها

-سامح توفى

-أي نعرف

-كيفاه

-دعوة مظلوم

-خلالك الورقة هذي

-شنوا فيها

-منعرش

خذاتها من عندو و قعدت تقرا فيها "حبيبتي ملكة

عيشك سامحني نعرف روحي غلط معاك برشا و فسدت عليك عرسك الله غالب فكرة أنو تكون مع راجل غيري تعبتني برشا تذكر كي كنت ناوي نهرب بيك ...وقتها كنت محضرلك أحلى عرس في الدنيا...... نعرش علاه نقول في الكلام هذا تو أما حاسس روحي قريب باش نموت يمكن هذاكا علاه ربي يسترك مع راجلك و يحميكم.... علي فكرة راجلك محلاه... نحبك "

الحلقة 25:

ملي قرات الورقة طاحت في القاعة تبكي و تنوح عمرها متوقعاتو يطلع رجلة و يحبها قد هكا. عمر هز الورقة يقرا فيها مصدوم و قلبو واجعو علي مرتو كيفاه تبكي

-ملكة شبيك تبكي

-كلو منك دخلت في حياتي كلو منك سامح كان طول عمرو يحبني و يموت عليا عمرو مقرب مني و مسني أنت هو السبب فلي صار فينا أنت السبب كاني هربت معاه راني متهنية و فرحانة بحياتي موش كيما معاك حسيت روحي عزوزة واخذة شايب كل شي لا الخروج ممنوع و قلنا ميسالش أما شوف روحك عمركش نهار حنيت عليا و سمعتني كلام حلو يخليني فرحانة طبعا لا خاترك طول الوقت و أنت جابد روحك طيشني مع النساء و تمشي للرجال و أنا نشوفك كان في الليل تكون تاعب ترقد أنا سايا تعبت عندك الحق لازم نكونو كل واحد عايش حياتو الخاصة بيه أنت في بلاصة و أنا في بلاصة لا ندخل فيك لا تدخل فيا و تهني منحشمكش قدام الرجال بدبشي بطبيعتي مقتنعة بلي هذا هو الطريق الصحيح

دخلت للبيت و خلاتو مصدوم فيها كيفاه تحكي و قلبها معبي عليه

تكى في الصالة و قعد يخمم وحدو "شبيها تحكي هكا هذي هبلت أكيد ..تو أنا بربي موش رومنسي ماو هوكا كل مرة نقلها يا مريتي.. أوووف لا لا النساء يحبو الكلام الحلو كيما نحبك.. تو أنا بربي كيفاه باش نعرف هي شنوا تحب  تي أنا معرفت حتي طفلة في حياتي غيرها.. زعما تحب الخرجات... تو نمشي نشوفها شنوا تحب "

مشالها للبيت و هد عليها

-ملكة شنما الحاجات لتحبهم

-بسم الله الرحمان الرحيم ماو لباس هاد عليا هكا تقول شرطة مكافحة الإرهاب

-هههه حلوة هذي

-هاهاها أخرج عليا

-موش قتلي نخاف وحدي

-لا منخافش أنا نخاف كان منك هم هذا تي أخرج

ترمى جنبها علي الفرش و حط راسو علي حبينها

-شبيك منرفزة

-خاتر سامح

-الإسم هذا معاش نحبو يتجبد في الدار باهي

-دبر علي روحك

كبسلها علي راسها بين يديه و هو كابس علي سنيه يحكي بالسيف

-ملكة خليني رايض متمرجنيش تعرف دمي سخون فيسع نشعل

-أبعد عليا معاش تلمسني.

تبعدلو في يديه و هو مكبش فيها لين حصرها في حضنو و زاد قربها ليه بساقيه

-مرتي المزيانة ديما محافظة علي روحها لراجلها و البدن هذا منشوفو كان أنا

-قليل تربية زايد

-شنيا هذي قليل تربية ياخي نسيت كيفاه كنت ترقد معايا...

-عمر يزي بلا مساطة و سيبني

-بو حبها هي المزيانة هههه

الحلقة 26:

مع الفجر عمر قام باش يصلي ميلقاش ملكة بجنبو تفجع و وجهو لخلخ قام يلوج عليها في البيت لين يسمع فيها في الحمام ترد و وجها أصفر

-ملكة شبيك

-حاسة بمعدتي مقلوبة يا عمر باش نموت

-اللطف عليك معاش تقول هكا

حملها في حضنو و قعد يمسدلها علي شعرها

-صغرونتي خلينا نصلو و نقومو نحضرو رواحنا باش نمشو قدا أهلك و بعدين باش نهبطو للبلاد

-م منحبش نمشي قدا أهلي

-ميجيش تقطع صلة الرحم خليك ديما متسامحة مالهم إلا عايلتك تعبو عليك و قروك

-متبريين مني راهم

-أنا هو الغالط و السبب في هذا الكل كاني شديت روحي و متكلمتش راو مصارش هكا

-صحيح أما زادا هوما يعرفو شنوا رباو

-ريت ملكة لازمك تجري علي والديك قد متقدر حتي كان تبوسلهم إيديهم و ساقيهم ميسالش كل شي يهون تعرف أنا كان يرجعو والديا حيين والله نبقى نطلب منهم في السماح و منخلصش إلي عملوه فيا

-عندك الحق

صلاو و قعدو يحضرو في دبشهم حطوه في الكرهبة و قصدو ربي لعايلة ملكة

-عسلامة أمي عسلامة بابا

-مرحبا بيكم تفضلو

دخلو للدار و ملكة نحات النقاب علي وجها و قعدت مقابلتهم ملي شافتها أمها تفجعت

-أه ملكة شبيه وجهك أصفر

هبطت راسها حاشمة من بوها و سمة الحشمة إكتسبتها من وقت لبست النقاب

لين تكلم عمر

-ملكة بمشيئة ربي سبحانو باش تجيب صغير

-مبروك عليك بنتي هالنهار السعيد وريريريريري

بوها تقلق شوي خايف كان تطلع بنتو حبلة من راجل أخر بحكم ماشي في بالو إلي هي كانت عاملة علاقة قبل ..الشيخ عمر طول فهمو و حب يبرر الموقف حط يدو علي يد بوها و تبسم

-بنتك جوهرة و عمرها مغلطت متخافش لازمك ترفع راسك بيها

تبسم بوها و حس روحو إرتاح شوي

-عمر خلينا نروحو

-أي لازمنا معاش وقت علينا

قام عمر و قامت ملكة معاه و غطات وجها  ....

باست يدين بوها و أمها و خرجت

-ملكة بنتي

دارت تغزر لأمها في يدها قفة مليانة

-نعم أمي

-بنتي خوذ شوي ماكلة شد بيهم صحتك و هوكا كي توصل منغير متبقي طيب لازمك ترتاح

-عيشك أمي ربي يفضلك

خذات من يدها القفة و باستها من جبينها و خرج

الحلقة 27:

وصلت للبلاد هي و عمر عرضوهم عماتو و بناويت عمو بالبخور و الزغاريط فرحانين بيهم

-يا مرحبا يا مرحبا بيك نورتونا

-عيشك عمتي ربي يفضلك

عمر مشى للرجال و ملكة بقات مع النساوين و هو فرحانين بيها و يسألو فيها علي حوالها و حوال أهلها.

عمر مبطاش برشا و جاء باش يروح بملكة لدارهم يزيهم متعبت واقف قدام الصور يستنى و مرت عمو توصل فيها لين سمعها تحكي منغير قصد

-ها ملكة رقصتي لراجلك و دلعتيه لين هزيتيه معاك للمدينة

تبسمت ملكة و قالت في قلبها"أشنوا دلعتو و رقصتلو تي هو طلقني جملا جرد لبسة "

-بربي بنيتي راجلك يستنى فيك الله يزين عليكم

-عيشك عمتي ربي يفضلك

روحت ملكة مع عمر علي ساقيهم بحكم الدار قريبة و طريق كامل ساكتين

سمو بسم الله و دخلو

-عمر ويني القفة لعطتهالي أمي

-هوكا في الكرهبة لحظة نجيبها و نجيب معاها الدبش

-باهي فيسع

دخلت هي لبيت النوم لبست جبة و حطت فولارة علي شعرها و مشات للكوجينة تستنى في عمر لين جاب القفة و بقات تفتح فيها و تتشهى ::ملوخية و طاجين و عسل و و و و

سمات بسم الله و غطست تاكل وحدها و هذا الكل و عمر مازال يحط في الدبش في البيت وين دخل للكوجينة يلقاها كلات أخر مورسو طاجينة و تكات التالي و حاطة يديها علي كرشها و تتنفس بالسيف

-ملكة ياخي قفة كاملة كليتها و مخلتليش

-شبنعملك بربي أنت بطيت و أنا جيعانة

-درج كليت هذا الكل مالا كان بقيت ساعة دار تقرمشها

-هههه يعطيك الخير ضحكتني و أنا موش منجمة ماو يا سموح قرمشو أنت الحيط خير

خرجت و خلاتو حال فمو ياسر لسانها طوال و ديما تكلاشي

21:00تاع الليل رقدت مفاقت كان مع 12:00 تتكسل

لبست عباية فوق دبشها و حجاب و مشات للحمام لين تسمع في صوت عمر البرا و معاه شكون محبتش تخرج باش ميعملهاش حالة و دخلت للبيت تستنى فيه و هي ذايبة بالجوع

الحلقة 28:

دخل عمر للبيت وين ملكة يلقاها قاعدة جنب الشباك و تتفرج في الماشي و الجاي

-هيا الحمد لله كي قمت

-أمممم وين كنت

-ساعة أفطر و إمبعد تو نحكيلك

-شنوا باش نفطر الكوجينة فارغة

-علاه دخلتها أنتي

-لا

-مالا قوم و أسكت هوكا جبتلك فطورك

-يا بالحق مرسي حتي أنا بنموت بالجوع

باستو من خدو و مشات للكوجينة تتكعبر تاكل في الشلاطة و فمها بكلو مبلحط و عمر واقف في الباب يتفرج فيها و يتبسم لين تجي عمتو

-عمر وليدي ويني كنتنا فطرت ولا مازال

هبط راسو و دار باش يمشي

-هاو تفطر تو

-باهي وليدي خليني نشوفها

دخلت مرت عمو للكوجينة و هو مشى لبيت النوم و فادد تمنى كان يزيد يبقى معاها أكثر و يشوفها كيفاه تاكل و يمسحلها فمها من الشكلاطة

في الليل قعد عمر و ملكة يتعشاو ساكتين لين كملو هز هو الماعون و غسلو محبش يتعبها و رجعلها

-ملكة باش نحكي معاك في موضوع

-أحكي إنشاء الله خير

-ماك تعرف بلي أنا عندي حوانت و ديار للكراء

-أيه

-لميت تفتوفة باهية قلت شنوا رايك نريقلو بيهم الدار و زيد كي نردوها فيلا و نوسعو فيها خير بحكم جاينا صغير في الثنية ربي يوصلو بالسالم

-عمر أحنا لازم نرجعو للمدينة

-علاه

-راني مازال كي خذيت الباك و لازمني نكمل نقرا في الفاك

-شنوا؟؟؟

-إيه عمر الحق نحب نكمل قرايتي

-و الصغير

-شبيه الصغير هاني حبلة و لباس أنا بنقرا موش باش نمشي نكور

-ملكة عزيزتي صحيح نحبك تقرا أما والله خايف عليك و علي الصغير و زيد كيفاه باش تتلهى بيه مع القراية

-عمر خليني نجرب معنا منخسرو أحنا و هوكا كان تحب في الصيف نجو هوني و بالنسبة لفلوسك خلينا نعملو بيهم مشروع خير

-منعرش ملكة خليني نخمم

-باهي خوذ راحتك

رقدت ملكة و قعد عمر يخمم مخو يهز و يجيب من جيهة خايف علي مرتو كان تتعب مع الحبالة و من جيهة أخرى مينجمش يحرمها من حقها في العلم

الحلقة 29:

عمر وافق علي كلام ملكة بخصوص قرايتها و قررو باش يرجعو للمدينة مع رجوع القراية

الصغار تجري في الدشرة و الرجال شادين كل واحد عيدو يسلخ فيه و النساوين تغسل في الدوارة كان ملكة تتفرج من بعيد بطبيعتها متنجمش تغسل و زيد الريحة قلقتها

بدات النساوين طيب و البنات تغسل في الحوسة تاع الماعون و الأميرة ملكة قاعدة ولا علي بالها لين يجيها صحين كبدة من ولد صغير

-عمتي الصحن هذا بعثهولك عمي الشيخ و قالك خوذ أفطر عليه

-هههه قلو أمانتك وصلت تهني عليها

خذات الصحن وطاحت تاكل فيه بطبيعتها مازالت صايمة ولازمها تفطر علي الكبدة ..عمر كي سمع كلام الطفل تبسم بالشوي منغير ميشلق

في الغداء تلمت العايلات كل واحد بشقالة كسكسي بالكبدة و يدورو فيهم بيناتهم يذوقو في خير بعضهم و ملكة قاعدة كان تتفرج منبه عليها عمر باش تاكل من وحدة بركا باش معدتها متقلقهاش أما شي شاهية غلبتها ولات دارت عليهم كل وحدة هزت منها معرفة ذاقتهم الكل و تهنات

قعدو قايلة كاملة و هوما يميعدو و يضحكو و كل مرة يتذكرو فازة تضحكو يضحكو عليها و هي بيناتهم دور في راسها مفاهمة شي ههههه

-بنتي ملكة منغير مطيبو الليلة مستدعيكم عمكم يحب يلمكم قبل متمشو

-عيشك عمتي وفرت عليا تعب الكوجينة

-هههه أي يا وحيدة لقيتها من الجنة و الناس عاد أه

-ههههه أي أي هههه

ملكة ياسر حبابة الكل يحبوها علي طبيعتها الخفيفة و كلامها المزيان متجبد حد و متنبر علي حد أما كلامها ياسر مزيان و مينفدش منه بالرغم من أنو أغلبية البنات ديما تنبر و بالنسبة ليهم الميعاد ميحلا كان بالتنبير و جبدان الناس و هذا حالنا للأسف

روحت ملكة لدارها تلقى عمر حاطط السقيطة في الكوجينة و قاعدة يقص في لحم باش يطبوه عشاء

-عمر شتعمل

-هاك تشوف فيا نقص في اللحم باش نطيبوه

-هههه الليلة مستدعيين في دار عمك

-الله يجازيهم خير علي الأقل رتحنا من التطييب و الماكلة الخايبة

-شتقصد

-نقصد أنا منحمش نطيب هههه

-أي أي صدقتك

بقات تتناقر هي وياه لين طاح الليل و مشاو قدا عمو تعشاو و قعدو يسهرو شوي و روحو

الحلقة 30 :

ملكة خذات شوي من العيد و الباقي خلاتو عند مرت عم عمر باش تعملهولها قديد خاتر هي معندهاش وقت لازمها ترسم و تدخل تقرا

أول نهار في الفاك عالم جديد و جو أخر أغلبية البنات شعر مفتوح و السراول المقطعة الحاصل دبش شبه محترم كانت الوحيدة المتنقبة في فاك كاملة إلي يشوفها يبقي يضحك عليها مسميينها المالك الحزين خاتر ديما تلبس في الأسود الأساذة زادا مكانوش يعبرو فيها برشا و مطفيينها.. الشي هذا خلاها تفد و تتقلق كل يوم تحكي لعمر شنوا صاير معاها بالضبط و كيفاه يقولولها الملك الحزين و ميحكي معاها حد كان حاسس بيها و بوجيعتها .معندو ميعمللها ميعرش كيفاه باش يخفف عليها .حاجة وحدة يعرف أنو ممكن ترتحها هي القرأن كل ليلة قبل مترقد يبقى يرتلها لين ترتاح و تتبسم بالنسبة ليها القرأن كان علاج للروح هو إلي يخليها ترجع تحب الدنيا

ملكة كانت متوجهة طبيبة نفسية أي واحد يعرف توجيها يبقى يضحك عليها و يقولو "هي كي الغراب كيفاه باش تجيها الناس" الكلام هذا كان يخليها تزيد تكبش في النقاب أكثر

كرشها ولات كل يوم تكبر و الصغير مهبلها في النهار تشهى 20 حاجة مترقد كان متخلي عمر يقرالها سورة البقرة كاملة

كيما نعرفو أنو البنات ديما كانت تصيرلهم مشاكل مع الحبيب ولا مع العايلة و ميلقاوش شكون يرشدهم و في الحالة هذي يلقاو زوز من الناس الصاحب إلي يحكي بيهم ولا إلي يهزهم للهاوية. ملكة كانت كل مرة تشوف طفلة تبكي وحدها و مقهورة كانت تخاف من أنو تقربهم و يسمعوها الكلام أما المرة هذي حبت تجرب هي معندها متخسر. كانت تشوف في طفلة وحدها حزينة و باين عندها مشكلة مشات حكات معاها و فهمت منها الحكاية نصحتها بطريقة واقعية و عملية و طبعا دينية في نفس الوقت خلاتها تقتنع بكلامها. بالنسبة لملكة كانت هذي أول تجربة للها في أنو تساعد شخص عندو مشكلة نفسية .كانت تجربة كافية أنو تخليها تزيد تحب توجيها و تتعمق فيه

فيسع العام كمل و ملكة دخلت في شهرها

-عمر عمر قوم

-نعم ملكة شفما

-عمر متقلقة

-مناش قلي

-معدتي يا عمر عاملة فيا حاسة روحي قريب نولد

-خليني نخدم الكرهبة و نهزك

لبس قميص و خرج يخدم في الكرهبة و هي تبكي و تعيط الفوق الفوق

هزها للسبيطار باش يولدوها و هي تعيط باش ميلمسها حتي راجل متهنات كان مجاتها طبيبة و إلي دايرين بيها الكل نساء

عمر كان البرا خايف عليها خاصة أنو باش يعملولها فض بكارة خاتر الغشاء متاعها مطاطي

الحلقة 31:

سوايع و سوايع و هي تتوجع و تعيط لين يسمع في صوت بكاء صغير قعد يشكر في ربي و يعاود فرحان قلبو يرفرف يحب يشوفو وليد ولا بنية خاتر مكانش حابب يشوف شنوا جنسو قبل ميجي

دخل عليها يلقاها فاشلة حالة عينيها بالسيف من الوجيعة

-ملكة لباس تو شتحس في روحك

كانت تهز في راسها و تحط موش منجمة تتكلم ..شوي و يجبولهم زوز صغار ولد و بنية

-م ملكة عنا توامة

تبسمت تبسيمة خفيفة فرحانة

-مبروك عليك التوامة مدام و الحمد لله الزوز صحتهم لباس

خذا عمر البيبيات الزوز في حضنو و قعد محملهم و يبكي سبحان الله قداه رحمة ربي واسعة و عطاهم صحتهم الكاملة سبحان الله

أول مسمعو عايلتها بالخبر جاو يجرو فرحانين بصغار. عمومات عمر زادا جاو باش يهنوهم و لتمو الكل قداهم لاهيين بيهم و بالصغار الدار تعبات بالكادوات و الفروشات و دبش فرحة كانت كبيرة برشا للناس الكل

تعدات الأعوام و ملكة تعدي في أخر مرحلة عندها أما صارتلها مشكلة منعتها من إجتياز إمتحان التخرج

-مدام ملكة متنجمش تعدي الإختبار و أنتي بالنقاب

-سامحني سي المدير أما مفهمتش شنوا المشكل أنا باش نعدي إختبار شفاهي موش علي لبستي

-ممنوع علي حرمة الجامعة أنو تخليك تعديه و أنتي متنقبة

-بقدرة ربي الإختبار باش نعديش إنشاء الله

خرجت من بيرو المدير مصدومة قلبها يوجع فيها و خبر حرمانها من تعداية الدفوار إنتشر في الفاك الشي إلي خلى فوضي تصير قدام بيرو المدير التلامذة الكل واقفين تحت شعار واحد """كلنا يد وحدة مع ملكة""""

تغزرلهم و مصدومة عمرها متوقعت منهم يساندوها بالطريقة هذي

هاو باش نفهمكم علاه وقفو معاها طبعا موش منغير سبب .ملكة بعد محكات مع الطفلة و عاونتها لقات تجاوب كبير من برشا بنات أخرين كانو يتقدمولها باش تحللهم مشاكلهم النفسية و تعرفت بقدرتها الفائقة في مجال الطب النفسي ......

الحلقة الأخيرة

الضغط الكبير إلي صار علي الإدارة خلاهم يتنازلو علي قرارهم و يوافقو باش يخلوها تعدي الإمتحان و أخيرا خذات شهادتها في الطب النفسي بعد عناء كبير

روحت للدار فرحانة تلقى عمر قاعد في الصالة يستنى فيها ملي شافها وقف

-ملكة قلي شعملت

-عمر نحب نقلك حاجتين

-قول ملكة إنشاء الله خير

-الخبر الأول راني نجحت و وليت طبيبة

-ألف مبروك حبيبتي أي و الخبر الثاني

قربت منو و حطت راسها علي صدرو تحب تسمع دقات قلبو كي يسمع الخبر

-ملكة تكلم فجعتني راك

هزت يدو و حطتها علي كرشها

-عمر أنا حبلة

حست قلبو قريب يخرج من بلاصتو بالفرحة

-يا عمري و يا روحي متعرش قداه فرحتني نحبك ملكة نححححححححبك والله نحب أنتي أكثر إنسانة فرحتني في حياتي راك جنتي في الأرض نحبك والله نحححبك

محملها و يدور بيها في الدار ملكة كل شي في حياتو

في الليل تكات علي صدرو و هي تتلمس في لحيتو و تضحك

-عمر

-عيونو

-تعرف لتو مانيش مصدقة أنو أنا مرتك حاسة روحي كلي نحلم

-لا يا روحي صدق صدق

-محلاها العيشة في طاعة ربي كل وين تضيق بينا ربي يفرجها الحمد لله

-الحمد لله علي نعمة الإسلام

رقدت في حضنو مرتاحة مفما شي مقلقها قلبها متهني و خاطرها زاهي

اليوم ملكة فاتحة قسم للطب النفسي خاص بالنساء و عمر فاتح محل تجاري كبير كل شي صار فيسع فيسع و ربي كثر عليهم برزقو

مقتطفات من حياة ملكة و عمر ::

-ملكة شتعمل شبيك لابسة لبست رقاصة

-شتهيت نلبس هكا و زيد نعرف نشطح علي الدربوكة

-هههه أي أي هاني نتفرج فيك كمل كمل

كرشها باينا شوي و بدنها مليان أبيض شعرها طوال يوصل لمسلانها و هي تشطح و تتمايل هبلاتو بدلالها

عمر يتكلم :

أحم أحم سامحوني يا جماعة تو نقلكم بالسلامة عندي منعمل أنا و مرتي. متنسوش تعملو جام و تكتبولنا تعليقاتكم في قصة حبنا باش نعمل عليهم طلة بالسلامة

....

حب ملكة و شيخ عمر كان مبني علي طاعة ربي صحيح